قالت ساندرا إبراهيم أنها علمت بنتيجتها وحصولها على المركز الأول وهي ذاهبة للكنيسة، مؤكدة أنها تفاجأت بمكالمة الوزير، وأضافت سكرتير الوزير كلمني واداني الوزير، وقالي إن أنا الأولى على الشعبة الأدبية، أنا مكنتش مصدقة إني هبقى الأولى على الثانوية العامة، وصحابي هما اللي بلغوا أهلي وسمعت الزغاريد.
وأكدت ساندرا أنها تتمنى دخولها كلية الألسن، مشيرة إلى أن مثلها الأعلى والدها وجدها مضيفة أنها تتمنى أن تصير مثلهما.
وأضافت الأولى على الثانوية أنا كنت باخد دورس وكنت اللي باخده بذاكره وبخلصه في نفس اليوم، وكنت بقعد على الفيس وبخرج وسافرت في نص السنة، مؤكدة أن نظام البوكليت حلو جدا ومبهج.
ونصحت ساندرا الطلاب بعمل كل ما عليهم حتى النهاية، موجهة الشكر لله ومدرسيها.
وأضاف إبراهيم ميخائيل والدها: اتصلت بينا وهي رايحه الكنيسة، وقالت إن الوزير كلمها وقالها إنها من الأوائل وتابع: مكنتش حاسس إنها طلعت الأولى على الثانوية العامة، بس كنت دايما حاسس إنها من العشرة الأوائل.
وأكد أنها بذلت مجهودا زي ما الكتاب قال، قائلا: أنا بقولها أنت ممكن تطلعي الأولى على الثانوية وأنا كان عندي أمل إنها هتطلع الأولى، ربنا كان معانا وأهو الفرحة والنجاح نستنا المعاناة.
واختتم: كنت بحلم أشوف ساندرا وهي صغيره تكون مبسوطة دلوقتي أنا سعيد بيها أوي، مش مهم مين هيكرمها المهم أن ربنا كرمها.