أعرب الإعلامي عمرو أديب، عن انزعاجه الشديد بسبب عدم وجود هدافين في الأندية المصرية، «يعني تيجي عند الأهلي يقولولك عندنا أربع أو 5 لاعيبة هدافين، بس مش بيجيبوا أجوان، تروح للزمالك يقولك عندنا 5 لاعبين هدافين، بس برضوا مش بيجيبوا أجوان»، موضحًا أن والتر بواليا لاعب النادي الأهلي أضاع عدة فرص تهديفية محققة في مباراة فريقه أمام فيتا كلوب مساء السبت.
وأضاف «أديب»، خلال تقديمه برنامج «الحكاية»، على شاشة «MBC مصر»: «بواليا ده والله كان فيه كورة أنا لو واقف هجبها جون، إنما يعني غريب، بواليا قوم على قوم فوائد، وفي الآخر يقولك اللاعب جيد ونصبر عليه، براحتكم، بس أداء اليوم للأهلي كان سيئ، وأداء الزمالك كان سيئ أيضًا، ده الزمالك محتاج معجزة عشان يعدي للأدوار القادمة».
وتابع: « النهاردة يوم سيء للأهلي والزمالك، الأهلي تعادل مع فيتا كلوب بهدفين لكل منهما، والزمالك خسر 3 أهداف مقابل هدف أمام الترجي، الشوط الأول الزمالك كان جيد، الشوط الثاني كان سيء بمعنى الكلمة، الزمالك فيه عيب خطير وأنا زملكاوي وعارف، فجأة تيجي حالة من حالات اليأس، مفيش المثابره لآخر لحظة».
وأردف الإعلامي: «بالنسبة للأهلي، أنا بواليا نرفزني، كمية الكور اللي ضيعها بواليا كانت ممكن تخلي الأهلي كسبان خمسة مثلا، مش قادر أفهم إزاي بيلاعبوه لحد الآن، والصبر على حسين الشحات، هو طلع بواليا وطلع حسين الشحات كبدلاء، اللي عمله بواليا النهاردة ينرفز، أنا لو من النادي الأهلي، أقوله أقعد ماتشين أو ثلاثة، هذا الإصرار من موسيماني على اللاعب غريب».
وأوضح الإعلامي عمرو أديب، أن الأهلي والزمالك ليس بهما أي هدافين، «مفهمش حد بيجيب جون، الأهلي النهاردة كان مستهين بالماتش، وأن الماتش هيكسبوه هيكسبوه، راح على جون فيتا كلب 20 مرة، وكور على الخط وكور بالرأس، محاولات كثيرة، مفيش واحد من اللي موجود يزقها».